Беҙҙең заман геройҙары

Ҙур наградаларға лайыҡ булыусылар исемлеген Юлыҡ ауылының аҫыл улдары ла тулыландыра. Күптән түгел махсус хәрби операцияға тәүгеләрҙән булып (2022 йылдың 26 сентябрендә) мобилизацияланып, МХО-ла батырлыҡтар күрһәтеп, үҙен ҡыйыу яугир итеп танытҡан МХО ветераны Айрат Ҡаразбаевҡа Рәсәй Федерацияһы Президенты Указына ярашлы, Батырлыҡ ордены тапшырылды. 2023 йылдың 4 февралендә Айрат Рәсүл улы Луганск Халыҡ Республикаһының Кременная ҡалаһы янында алғы һыҙыҡта алыштар мәлендә ике тапҡыр ҡаты яраланып, контузия ала. Башта ялан госпиталендә, һуңынан Мурманск өлкәһенең Североморск ҡалаһы госпиталдәренең береһендә 41 көн аңһыҙ (комала) ята. Көслө ихтыярлы яугир табиптар тырышлығы, ҡатыны ярҙамында аяҡҡа баҫа. Яралары ҡаты булғанлыҡтан, реабилитация үтергә тура килә, 2023 йылдың июлендә яу яланына түгел, запасҡа күсерелә.
Йәнә бер Юлыҡ яугиры – Айрат Моратовҡа Батырлыҡ ордены МХО-ла күрһәткән батырлыҡтары өсөн РФ Президенты Указы нигеҙендә, ҡыҙғанысҡа ҡаршы, һәләк булғандан һуң, апаһына тапшырылды. Айрат Миңлебай улы 2023 йылдың 18 июлендә Рәсәй Оборона министрлығы менән контракт төҙөшөп, МХО-ға юллана. Әммә 2024 йылдың 6 апрелендә яу яланында батырҙарса һәләк була.
Яңғыҙҡайын ауылынан Рәфис Йәрмөхәмәтов та МХО-ға ике йыл элек мобилизациялана һәм бөгөн Ватаныбыҙ сиктәрен батырҙарса һаҡлай. Ватанды һәм Рәсәй Федерацияһының дәүләт мәнфәғәттәрен һаҡлағанда хәрби хәрәкәттәрҙә күрһәткән ҡыйыулығы, фиҙаҡәрлеге һәм шәхси батырлығы өсөн Жуков миҙалы менән бүләкләнә. Ошо уҡ ауылдан Фәнис Ғәлиев МХО-ла РСЗО “Торнадо” водителе булып хеҙмәт итә. Өлгөлө хеҙмәте, батырлығы өсөн “Хәрби батырлыҡ өсөн” миҙалы һәм полк командирының Рәхмәт хаты менән бүләкләнгән.
Шулай уҡ Илнур Нәбиуллин да мобилизацияның тәүге көндәренән үк илебеҙҙе алғы сафта намыҫ менән һаҡлай. Хәрби бурысын үтәгәндә күрһәткән ҡыйыулығы һәм фиҙаҡәрлеге өсөн яугир Суворов миҙалына лайыҡ була. Яҡташыбыҙ ҡыҫҡа ваҡытлы отпускыға ҡайтҡан ваҡытта уға награданы район хакимиәте башлығы Венер Вахитов тапшырҙы.
Егеттәрҙе ҡотлайбыҙ һәм районыбыҙҙың бөтә яугирҙарына ныҡлы һаулыҡ, көс һәм сыҙамлыҡ, башланған эште тиҙерәк тамамлау һәм Еңеү менән тиҙерәк өйҙәренә әйләнеп ҡайтыуҙарын теләйбеҙ!