Килер йыл ниндәй булыр, уны нисек ҡаршыларға?

Йылды нисек ҡаршы алабыҙ?

Йылан йылын ҡаршылауға килгәндә, өйҙә ысын шыршы ҡуйыу хуплана – ул йыл стихияһына ла, төҫөнә лә тап килеп кенә тора. Байрамға йорт-ерҙе биҙәгәндә лә тәбиғи материалдар, йәшел аксессуарҙар бара.

Ниндәй кейем һайларға?

Нәзәкәтле, нескә зауыҡлы Йыланды лайыҡлы ҡаршылайым тиһәң, затлы туҡыманан ҡупшы-нәфис тегелешле кейем һайлағыҙ. Төҫтәр ағас стихияһына тап килһен: йәшелдең, көрәндең барлыҡ төҫмөрҙәре, шулай уҡ көмөш һәм мәрүәт (перламутр) килешер. Йыландар төйәге – сүллек-далалар, ҡом, таш, тупраҡ төҫтәрен иҫкә төшөрөп, шуларҙы һайларға була. Кейем тап һанап үтелгән төҫтәрҙә булмаһа ла, өҫ-башығыҙҙағы берәй деталде шул төҫтә һайларға була. Ә бына “ағыулы”, һәм “неон” төҫтәрҙән, үтә ҡысҡырып торған биҙәктәрҙән ҡасығыҙ. Тәбиғәт биҙәктәре: япраҡ, үлән-сәскәләр төшкән, йә булмаһа йылан биҙәген төҫмөрләткән принттар хуплана. Күлдәктәрҙең атлас, сатин, ебәк кеүек шыуып торған туҡымалыһына өҫтөнлөк бирегеҙ. Иң мөһиме – зауыҡ, сама тойғоһон онотмағыҙ, үҙ-үҙегеҙ булып ҡалығыҙ.

Ғөмүмән, Яңы йылды ҡаршылағанда ғына түгел, модала дөйөм йүнәлеш шундай: тәбиғи материалдар (кизе-мамыҡ, етен, бамбук) - кеше менән тәбиғәттең берлеген күрһәтә; ассимметрия – бер еңле күлдәк-блузкалар, итәге бер яҡҡа оҙонайтылған кейемдәр үҙгәрешкә әҙерлекте, тигеҙһеҙлектә лә камиллыҡ таба белеүҙе аңлата; кәүҙәгә ятып торған, билле кейемдәр – киң һәм ҙур “оверсайз”ды ҡыҫырыҡлап, яңынан модаға инә; трансформер кейемдәр – бер деталде төрлөсә итеп, көндәлеккә лә, эшкә лә, байрамға ла кейеп булыуы практиклыҡҡа ишара. Шулай уҡ киләһе йылдарҙа киң, ҙур яурынлы, иңбашы биҙәкләнгән кейемдәр модаға ҡайта.