Хеҙмәтегеҙ халыҡҡа шатлыҡ килтерһен

Байрам алдынан район хакимиәте башлығының төҙөлөш һәм торлаҡ-коммуналь хужалыҡ буйынса урынбаҫары Фуат КЕЙЕКБАЕВ менән әңгәмәләштек.
- Фуат Зәки улы, райондың төҙөлөш тармағындағы хәлдәргә байҡау яһап үтһәгеҙ ине. Тармаҡта үткән йылдың төп ваҡиғалары ҡайһылары булды тип уйлайһығыҙ?
- Беренсе ярты йыллыҡта беҙ 15 мең кв.м самаһы торлаҡ сафҡа индерҙек, был 2024 йылдың ошо уҡ осоро кимәле. Ҡыҙғанысҡа ҡаршы, әлегә шәхси торлаҡ тураһында ғына һүҙ бара, әммә районыбыҙ ингән авария хәлендәге торлаҡ фондынан граждандарҙы күсереү программаһын тормошҡа ашыра башлағас, тиҙҙән Табын ауылының Үҙәк урамындағы 65-се һәм Курорттың Баҡса урамындағы 9-сы авария хәлендәге йорттарҙан күсерелгән граждандар өсөн күп фатирлы торлаҡ йорт төҙөй башларбыҙ, тип ышанабыҙ. Маҡсатлы күрһәткес – 24 мең квадрат метр торлаҡ – йыл аҙағына етәсәкбеҙ.
- Газ үткәреү, һыу менән тәьмин итеү һәм юлдар менән бәйле хәл муниципалитеттағы хәл тураһында асыҡ һөйләй...
- Һуңғы йылдарҙа илебеҙҙә “газ” мәсьәләһенә ҙур иғтибар бирелә. Рәсәй президенты Владимир Путиндың ҡушыуы буйынса ғәмәлгә ашырылған газлаштырыу программаһы сиктәрендә район үҙәгендә генә “Йәштәр”, “Һабантуй”, “Сахалин”, “Лубат”, “Һамар” биҫтәләрендә 32,14 саҡрым газ бүлеү селтәре төҙөлдө. Шулай уҡ Сәйетбаба - Ҡаранйылға - Ҡолҡан һәм Түбәнге Ташбүкән - Үрге Ташбүкән - Ҡурғашлы ауыл-ара газ үткәргесенең 31,58 км һәм үрҙә аталған тораҡ пункттарҙа ауыл эсендәге газ үткәргестең 23,16 км һалынған. Һыу менән тәьмин итеү буйынса ла яҡшы яңылыҡтар бар. Район хакимиәте Красноусол ауылының “Көньяҡ-көнбайыш” биҫтәһен һыу менән тәьмин итеү өсөн һыу үткәргес селтәрҙәр төҙөүгә проект-смета документацияһын әҙерләне. Дәүләт экспертизаһының ыңғай һөҙөмтәһе алынған. Капитал һалыуҙар күләме 160 млн һумдан ашыу тәшкил итә. Был объектты төбәк һәм федераль программаларға индереү өсөн ғаризалар бирелгән.
Юл мәсьәләһенә килгәндә, 2025 йылға территориаль заказға ярашлы, район үҙәгендәге Еңеү һәм Матросов урамдарына, Леваневский урамының бер өлөшөнә асфальт-бетон япма һалыу эштәре тамамланды. Республика Башлығы Радий Хәбировтың ҡушыуы буйынса терәк пункттарҙың, шул иҫәптән Красноусол ауылының да юлдарын асфальтлау өсөн өҫтәмә аҡса бүленә.
- Төҙөкләндереүҙе лә иғтибарҙан ситтә ҡалдырырға ярамай. Был йүнәлештә ниндәй эштәр алып барыла?
- Йола буйынса беҙҙең районда йыл һайын “Йәшел Башҡортостан”, “Хәтер Баҡсаһы” акциялары, экологик өмәләр һәм Таҙалыҡ көндәре үткәрелә. Быйыл беҙ “Йәшлек” ял паркында 150 төп шыршы ултырттыҡ, шунда уҡ махсус хәрби операцияла ҡатнашыусыларҙың Хәтер аллеяһына нигеҙ һалынды. Әйткәндәй, бөтә үҫентеләр ҙә тамыр йәйгән, хәҙер уларҙы даими тәрбиәләп торорға кәрәк. “Йәшәү өсөн инфраструктура” милли проекты сиктәрендә бы-йыл “Йәшлек” паркында стадионды төҙөкләндереү буйынса проект тормошҡа ашырыла. Бында йүгереү юлы төҙөләсәк, стадионды яҡтыртыу ҡоролмалары һәм ҡоймаһы монтажланасаҡ, йәшелләндереү эштәре үтәсәк.
- Фуат Зәки улы, ҡоро һандар артында һәр ваҡыт кешеләрҙең эше тора. Байрам алдынан хөрмәтле төҙөүселәребеҙҙән кемдәрҙе билдәләп үтер инегеҙ?
-Тәү сиратта беҙҙең арала булмаған ветерандарыбыҙҙы иҫкә төшөрөргә теләйем: улар - Әмир Харрас улы Кәримов, Павел Петрович Семиков, Фәнис Ғәни улы Басиров, Виктор Алексеевич Кандалов, Манвел Григорьевич Галиджан. Улар райондың төҙөлөш тармағына баһалап бөткөһөҙ өлөш индергән ысын профессионалдар булды.
Был тармаҡ үҫеше өсөн күп эшләгән хәҙерге ваҡытта иҫән ветерандарыбыҙ: Б.Ә.Кәримов, Р.С.Нафиҡова, В.А.Ширяев, А.А.Вәлишин, А.А.Фәтҡуллина, Р.С.Фәйезовты яҡынлашып килгән байрам менән ихлас ҡотлайым, бөтәһенә лә дәртле, әүҙем оҙон ғүмер теләйбеҙ.
Төҙөүселәр көнө алдынан районыбыҙҙың төҙөлөш өлкәһе вәкилдәренә, хөрмәтле подрядсыларыбыҙ: Б.А.Газгиреев, З.И.Хәлимова, С.О.Мартиросян, П.А.Отмахов, “Ишембайжилстрой” АЙ-е һәм МСО хеҙмәткәрҙәренә ҡотлауҙар юллайым. Һеҙгә еңел булмаған хеҙмәтегеҙ өсөн рәхмәт. Һәр яңы проект уңышлы булһын, һәр төҙөлөш хәүефһеҙ, ә хеҙмәт һөҙөмтәләре халҡыбыҙға шатлыҡ һәм ғорурлыҡ килтерһен. Һеҙгә ныҡлы һаулыҡ, ғаилә именлеге, тотороҡлолоҡ, яңы ҡаҙаныштар һәм иртәгәһе көнгә ышаныс теләйем. Төҙөүселәр көнө менән!
- Һеҙҙең ҡотлауҙарға беҙ ҙә ҡушылабыҙ. Байрам менән!

- Башҡортостан төҙөлөш комплексы ҡаҙаныштары менән хаҡлы рәүештә ғорурлана ала. Һеҙҙең хеҙмәтегеҙ арҡаһында республика тотороҡло рәүештә алдынғы ун төбәк иҫәбенә инә, Волга буйы федераль округында икенсе урынды биләй. Былтыр һеҙ 3 миллион 350 мең квадрат метр төҙөп, үҙ рекордығыҙҙы яңырттығыҙ. Быйыл миллион квадрат метрҙан ашыу торлаҡ сафҡа индерелгән. Милли проекттар төҙөлөш тармағын үҫтереү өсөн мөһим стимул булып тора. Һуңғы алты йылда республикала дөйөм һыйҙырышлылығы 53 мең уҡыусыға иҫәпләнгән мәктәптәр, 27 меңдән ашыу урынлыҡ балалар баҡсалары, 5 мең урынлыҡ дауаханалар, сменаһына 9 мең кеше ҡабул итеүгә иҫәпләнгән поликлиникалар һәм тағы ла йөҙләгән объект төҙөлгән. Үҫешкән инфраструктуралы заманса торлаҡ комплекстары булдырылған – балалар һәм спорт майҙансыҡтары, скверҙар һәм парктар, - тип билдәләне Радий Хәбиров Өфөнөң «Торатау» конгресс–холында уҙған республика төҙөүселәрен һөнәри байрамдары менән ҡотлау тантанаһында.