Водитель ҡатын-ҡыҙҙарға - сәскәләр

Юл хәрәкәте хәүефһеҙлеге хеҙмәткәрҙәре  машиналар ағымы көслө булған Ленин урамында  руль артында  ҡатын-ҡыҙ булған һәр машинаны туҡтатты. Кемдер шундуҡ ҡаушап, “Нимә булды, ҡағиҙә боҙманым, шикелле,”- тип аптырап ҡалһа, икенселәре туҡтау менән  документтарын барлай  башланы. Ә инде ЮХХДИ  инспекторҙары  гүзәл заттарҙы 8 март менән ҡотлап, иң яҡшы теләктәр менән ләлә сәскәләре бүләк иткәс, йөҙҙәре асылып китте.

-Руль артына ултырыуыма  6 йыл самаһы инде. Инспекторҙарҙан беренсе тапҡыр сәскә алыуым. Ҡағиҙә боҙған өсөн штраф квитанцияһы, йә булмаһа “бәхет хаты” на  ҡарағанда сәскә алыу бигерәк күңелле,- ти Алһыу.

Юл хәрәкәте хәүефһеҙлеге идаралығы испекторҙары ҡулынан сәскә алыусылар ифрат шатланып, байрам кәйефтәре бермә-бер күтәрелде, Һәр береһе  инспекторҙарға ихлас итеп рәхмәт әйтте.

Мәрхәбә Собханғолова.