Кескәй булһалар ҙа, оҫталар!

Конкурста Красноусолдың “Миләшкәй”, “Әкиәт”, “Тирәккәй”, “Тирмәкәй” балалар баҡсаларынан, Сәйетбаба, Йөҙимән, Юлыҡ, Ибраһим, Еҙем-Ҡаран, Яугилде, Байымбәт, Аҡкүл, Родина, Яңғыҙҡайын, Туғай, Ҡауарҙы, Курорт ауылдарынан 5 йәштән 7 йәшкә тиклемге балалар баҡсаларына йөрөүсе 33 бала ҡатнашты.
Шиғыр ятлауҙың файҙаһы бик күп: хәтер яҡшыра, тел байлығы арта, телмәр үҫә, ҡыйыулыҡ өҫтәлә, фекерләү байый. Мәктәпкәсә йәштәге балалар өсөн ул айырыуса мөһим, шиғыр артикуляция аппаратын көйләй һәм һүҙлек запасын байыта, ваҡ һәм дөйөм моторика үҫә.
Конкурстың маҡсаты булып танып белеү, телмәр һәм художество-эстетик үҫеш өлкәһендә мәктәпкәсә йәштәге балалар менән эшләү сифатын күтәреү, һәләтле уҡыусыларҙы асыҡлау һәм уларға үҙ-үҙен үҫтереү өсөн мөмкинлек биреү торһа, балалар был конкурсҡа атай-әсәйҙәр, тәрбиәселәр ярҙамы менән ныҡлы әҙерләнгән.
Конкурсты “Миләшкәй” балалар баҡсаһының йәш тәрбиәләнеүселәре сағыу сығыштары менән асты. Балаларҙың “Минең илем - Рәсәй” коллектив бейеүе һәм рус халыҡ инструменттары оркестрының дәртле сығышы барыһының күңеленә хуш килеп, сарала сығыш яһаусыларға дәртләндереүсе көс бирҙе.
“Рәсәй һәм Башҡортостан Республикаһы халыҡтарының берҙәмлеге” номинацияһында: Ульяна Фәйзуллина һәм Карина Шәрәфетдинова (“Тирәккәй” балалар баҡсаһы), Сафия Ҡорманғолова (“Теремок” балалар баҡсаһы); “Минең ҙур һәм татыу ғаиләм” номинацияһында: Йәмилә Дәүләтбаева (“Әкиәт” балалар баҡсаһы), Ралина Фәйзуллина (“Тирәккәй” балалар баҡсаһы), Самир Фәхретдинов (Сәйетбаба ауылы) еңеүсе булды. Бәйгеселәрҙе абруйлы баһалама комиссияһы: район мәғариф бүлеге методистары Лира Бәхтийәрова, Ольга Ғүмәрова, Гөлсинә Зәйнуллина баһаланы. Шиғырҙар ҡабатланып торһа ла, улар һәр уҡыусының һөйләй белеү ҡеүәһенә ҡарап яңыса яңғыраны.
Еңеүселәрҙе һәм призёрҙарҙы һоҡланғыс сығыштары менән ҡотлайбыҙ. Киләсәк быуындың илебеҙҙе, Башҡортостаныбыҙҙы данлап, ғорурлыҡ менән шиғыр һөйләүҙәре бик һөйөндөрә.