Сығарылыш уҡыусылары парады үтте

Тулҡынландырғыс, шул уҡ ваҡытта шатлыҡлы ла был көн сығарылыш уҡыусылары өсөн күп йыллыҡ хеҙмәт, тырышлыҡ һөҙөмтәһен кисереү, шулай уҡ уларҙың ата-әсәләре һәм уҡытыусылары өсөн онотолмаҫлыҡ мәл булдғандыр.

Сәғәт алтыла майҙан матур кейенгән, ал таҫмалар таҡҡан уҡыусылар һәм шатлыҡ атмосфераһы менән тулыланып, барыһы ла сара башланыуын түҙемһеҙлек менән көтә ине.

Йола буйынса, парад сығарылыш уҡыусылары башҡарған һоҡланғыс вальс менән асылды. Был бейеү яңы мөмкинлектәр һәм саҡырыуҙар менән тулы бер тормоштан икенсеһенә күсеү символы булып тора. Музыка тауышына сығарылыш уҡусылары майҙанды биҙәп вальс әйләнде, ә тамашасылар уларҙың бейеүенә һоҡланып ҡарап, көслө алҡыштарға күмде.

Мәктәпте тамамлаусыларҙың атай-әсәйҙәре лә ситтә ҡалманы, улар балаларының ҡаҙаныштары һәм яҡты киләсәккә өмөтө өсөн ғорурлыҡтарын сағылдырып, моңло йырҙар йырланы. Уларҙың йыр-бүләктәре барыһының күңеленә хуш килде.

Парад сағыу һәм символик мәл менән тамамланды. Сығарылыш уҡыусылары “Азатлыҡ!” тауышы аҫтында мәктәп дәфтәрҙәрен һауаға ырғытты. Был мәл мәктәп мәшәҡәттәренән азат булыу һәм мөмкинлектәр, мажаралар менән тулы яңы тормош башлау күренеше булып яңғыраны.

Был көн сығарылыш класс уҡыусылары өсөн иҫтәлекле, онотолмаҫлыҡ байрам булды. Уларға имтихандарҙы уңышлы тапшырып, артабан хыялдарына ныҡышмалы юл ярып, маҡсаттарына ирешеүҙәрен теләйбеҙ!