Изгелектә – көс! Кескәйҙәр өсөн Башҡортостан тураһында яңы комикс сыҡты

Комикс бер журналда 8 сюжетты берләштерә. Хикәйә үҙәгендә  - Урал исемле малай һәм уның тылсымлы аты Аҡбуҙат. Улар Башҡортостан буйлап сәйәхәт итә. Героик эпостан айырмалы рәүештә, проект балалар аудиторияһына йүнәлтелгән һәм яҡшы, аңлайышлы хикәйәләр серияһы кеүек төҙөлгән.

Һәр хикәйәлә бәләкәй герой тирә-яҡтағыларға ярҙам итергә өйрәнә, Башҡортостандың тәбиғәте, башҡорт халҡының милли ризыҡтары менән таныша, сәскәләрҙең, һандарҙың атамаларын һәм мәҙәниәттең башҡа элементтарын өйрәнә. Уйын һәм мажаралы сюжеттар аша уҡыусыларға ябай, әммә мөһим тормош ҡиммәттәре: изгелек, ҡыйыулыҡ, хәстәрлек һәм белемгә ынтылыш һынландырыла. Проекттың төп идеяһы - ысын көстөң белем, изгелек, ҡыйыулыҡ һәм яҡындарың тураһында хәстәрлек күреүҙә булыуын күрһәтеү.

Проект авторы - Лариса Абдуллина, "Аҡбуҙат"журналының баш мөхәррире:

- Беҙҙең проект балалар араһында Башҡортостандың мәҙәни һәм тәбиғи мираҫын популярлаштырыуға, йолаларға һәм тирә-яҡ мөхиткә һаҡсыл мөнәсәбәт булдырыуға, шулай уҡ тыуған яҡҡа ҡыҙыҡһыныу уятыуға йүнәлтелгән.  Иллюстрацияларҙы рәссам Ирина Әхмәҙуллина эшләне. Яҡты һәм сағыу һүрәттәр балалар өсөн махсус яраҡлаштырылған һәм хикәйәне мауыҡтырғыс һәм аңлайышлы итә.

Баҫма "Башҡортостан Республикаһы" нәшриәт йорто типографияһында 800 дана тираж менән сығарылған. Комикстар республиканың мәктәпкәсә учреждениеларына тапшырыласаҡ.

“Аҡсарлаҡ” АНО-һы.